✨ سبرینا: جس نے خوابوں کو پر لگا دیے

شارق علی
ویلیوورسٹی

کچھ بچے کھلونوں سے کھیلتے ہیں، اور کچھ بچے خواب دیکھ کر مستقبل تراشتے ہیں۔
سبرینا گونزالیز پاسٹرسکی دوسری قسم کی بچی تھی۔

شکاگو میں پیدا ہونے والی سبرینا کے لیے آسمان صرف نیلا کینوس نہیں تھا، بلکہ سوالات سے بھری ایک کتاب تھا۔ نو برس کی عمر میں جب وہ پہلی بار ہوائی جہاز میں بیٹھی تو شاید کسی کو اندازہ نہ تھا کہ یہ بچی ایک دن نہ صرف جہاز اڑائے گی بلکہ کائنات کے رازوں تک رسائی کی کوشش کرے گی۔

بارہ برس کی عمر میں سبرینا نے ایک غیر معمولی فیصلہ کیا:
اس نے اپنا ہوائی جہاز خود بنانے کا ارادہ کیا۔
نہ یہ اسکول کا پراجیکٹ تھا، نہ کسی مقابلے کی تیاری، یہ محض شوق، تجسس اور محنت کا نتیجہ تھا۔ دو سال بعد، صرف چودہ برس کی عمر میں، وہ اپنے بنائے ہوئے جہاز کو اکیلے اڑانے والی امریکا کی کم عمر ترین پائلٹس میں شامل ہو چکی تھی۔

یہیں سے اس کہانی نے ایک نیا موڑ لیا۔

سبرینا نے جان لیا کہ جہاز اڑانا ایک فن ہے، مگر یہ جاننا کہ چیزیں اڑتی کیوں ہیں ، یہ سائنس ہے۔
اسی سوال نے اسے ایم آئی ٹی (MIT) تک پہنچایا، جہاں اس نے فزکس کو اپنا میدان چُنا۔ تین برس میں ڈگری، مکمل 5.0 GPA، اور کئی دہائیوں بعد فزکس میں ٹاپ کرنے والی پہلی خاتون۔ یہ سب محض نمبرز نہیں تھے، یہ ایک ذہن کی وسعت اور گہرائی کا اعلان تھا۔

مگر سبرینا یہاں نہیں رکی۔

ہارورڈ یونیورسٹی میں اس نے نظریاتی طبیعیات (Theoretical Physics) میں پی ایچ ڈی کی، جہاں اس کا کام گریویٹیشنل ویوز، اسپیس ٹائم اور کوانٹم گریویٹی جیسے مشکل ترین موضوعات پر تھا۔ اس کی تحقیق اتنی اہم ثابت ہوئی کہ اسٹیفن ہاکنگ جیسے عظیم سائنسدان نے بھی اس کے کام کا حوالہ دیا۔

آج سبرینا دنیا کے معتبر ترین تحقیقی اداروں میں سے ایک، پیری میٹر انسٹی ٹیوٹ (کینیڈا) میں کام کر رہی ہے، جہاں وہ “Celestial Holography” جیسے انقلابی نظریات پر تحقیق کی قیادت کر رہی ہے۔ یعنی یہ سمجھنے کی کوشش کہ شاید پوری کائنات ایک عظیم ہولوگرام ہو۔

فوربز کی “30 انڈر 30” فہرست میں نام آنا، عالمی سطح پر پہچان حاصل کرنا۔ یہ سب اعزازات اپنی جگہ، مگر سبرینا کی اصل طاقت اس کا پیغام ہے:

اگر تجسس زندہ ہو، اور محنت سچی ہو، تو عمر، جنس اور وسائل رکاوٹ نہیں بنتے۔

سبرینا کی کہانی ہمیں یہ سکھاتی ہے کہ
خواب دیکھنا پہلا قدم ہے،
مگر خواب کو علم، محنت اور صبر کے ساتھ جوڑ دینا۔ یہی اصل پرواز ہے۔