نرگس مالوالہ: ایک نامور پاکستانی آسٹروفزسسٹ
نرگس مالوالہ پاکستانی نژاد آسٹروفزسسٹ ہیں جن کا نام آج دنیا کی صفِ اول کی سائنسدانوں میں شمار ہوتا ہے۔ ان کا تعلق ایک ایسے شعبے سے ہے جو کائنات کے سب سے بڑے اور پیچیدہ مظاہر کی تحقیق کرتا ہے۔ وہ ایم آئی ٹی کی پروفیسر اور MIT’s School of Science کی ڈین ہیں، جو دنیا کی سب سے معزز یونیورسٹیوں میں سے ایک ہے۔
آسٹروفزسسٹ کا کام کائنات کے اصول و قوانین کو سمجھنا ہے، جن میں بگ بینگ اور دیگر کائناتی واقعات شامل ہیں۔ آسٹروفزسسٹ وہ سائنسدان ہیں جو ستاروں، کہکشاؤں اور کائناتی ساختوں کی فزکس کو سمجھنے کی کوشش کرتے ہیں۔
نرگس مالوالہ نے کششِ ثقل کی لہروں کے بارے میں آئن سٹائن کے نظریے کی تصدیق میں اہم کردار ادا کیا۔ کششِ ثقل کی لہریں یا گریوٹیشنل ویوز وہ لہریں ہیں جو بڑے کائناتی واقعات جیسے بلیک ہولز کے تصادم کے دوران پیدا ہوتی ہیں۔ 2015 میں، سائنسدانوں کی ایک ٹیم نے ان لہروں کا مشاہدہ کیا اور نرگس اس ٹیم کا حصہ تھیں۔ اس دریافت نے سائنس کی دنیا میں ہلچل مچا دی اور نرگس کی خدمات کو عالمی سطح پر سراہا گیا۔
نرگس مالوالہ کی خدمات نہ صرف آسٹروفزکس کے میدان میں نمایاں ہیں بلکہ وہ پاکستانی خواتین کے لیے ایک مثالی کردار بھی ہیں۔ ان کی تحقیق اور کامیابیاں ہمیں بتاتی ہیں کہ علم کی دنیا میں کوئی بھی امتیازی سرحد نہیں ہوتی، اور خواتین بھی عظیم علمی کارنامے انجام دے سکتی ہیں۔
ایم آئی ٹی نے نرگس مالوالہ کو MIT’s School of Science کا ڈین مقرر کر کے ان کی خدمات کا اعتراف کیا ہے۔ یہ سکول دنیا کی زیادہ تر نئی سائنسی تحقیق کے اعزازات کا حامل شمار ہوتا ہے، اور نرگس جیسے ذہین سائنسدان کی قیادت میں یہ سکول مزید بلندیوں کو چھو رہا ہے۔
نرگس مالوالہ کی کہانی ہمیں یاد دلاتی ہے کہ ہمیں اپنی بیٹیوں کو بلند خواب دیکھنے کی تربیت دینی ہوگی، وہ خواب جو کائنات کے وجود کی گتھیاں سلجھانے میں مدد دے سکیں۔ اس کائنات میں عورتوں کا بھی اتنا ہی حصہ ہے جتنا مردوں کا، اور نرگس مالوالہ کی مثال ہمیں بتاتی ہے کہ خواتین بھی عظیم سائنسی کارنامے انجام دے سکتی ہیں۔
ہمیں نرگس مالوالہ جیسی شخصیتوں کی قدر کرنی چاہیے اور ان کے نقش قدم پر چلتے ہوئے اپنے ملک کا نام روشن کرنا چاہیے۔ ان کی خدمات اور کامیابیاں ہمیں یہ سکھاتی ہیں کہ علم اور تحقیق کی دنیا میں کوئی بھی حد نہیں ہوتی، اور محنت اور لگن سے ہر خواب پورا کیا جا سکتا ہے۔
شارق علی
ویلیوورسٹی