میگڈیلینا: 15,000 سال پرانا راز

شارق علی
ویلیوورسٹی

ذرا تصور کریں کہ آپ کسی ایسے شخص کی آنکھوں میں دیکھ رہے ہیں جو 15,000 سال پہلے زندہ تھا—وہ زمانہ جب نہ اہرام مصر موجود تھے، نہ لکھی ہوئی تاریخ، اور نہ ہی دنیا مکمل طور پر برفانی دور سے آزاد ہوی تھی

1911 میں فرانس کے ایک چونے کے پتھر کی غار سے دریافت ہونے والی اس قدیم کھوپڑی کو ابتدا میں ایک نوجوان لڑکی سمجھا گیا۔ کیونکہ یہ نسبتاً چھوٹے سائز کی تھی اور اس کی عقل داڑھ موجود نہیں تھی۔ اسے میگڈیلینا لڑکی کا نام دیا گیا۔ لیکن بعد میں ایک حیرت انگیز انکشاف ہوا—جدید ایکسرے اسکین سے پتہ چلا کہ اس کی عقل داڑھ جبڑے میں دبی ہوئی موجود تھی، جو آج کے انسانوں میں بھی ایک عام مسئلہ ہے۔ درحقیقت، وہ بچی نہیں ایک بالغ عورت تھی، جو 25 سے 35 سال کی عمر میں فوت ہوئی۔

یہ کھوپڑی دریافت کے دوران نقصان زدہ ہوئی اور غلط طریقے سے جوڑی گئی، لیکن جدید ڈیجیٹل بحالی تکنیک نے اسے دوبارہ درست حالت میں کر دیا۔ معروف فرانسیسی مجسمہ ساز ایلیزبیتھ ڈینس نے اس بنیاد پر اس کا چہرہ تخلیق کیا۔ نتیجہ؟ اونچی گال کی ہڈیاں، نازک نقوش، اور ہلکی سی پراسرار مسکراہٹ—بالکل مونا لیزا کی طرح!

میگڈیلینا عورت ایک ایسے دور میں زندہ تھی جب کتے پالتو بناے جا چکے تھے، اور قدیم انسان ایک بدلتی ہوئی دنیا میں زندہ رہنے کے ہنر سیکھ رہے تھے۔ وہ ایسی زمین پر چلتی ہوگی جو ابھی گلیشیئرز کے پگھلنے کے بعد خود کو سنبھال رہی تھی۔ ممکن ہے کہ وہ جانوروں کی کھالیں پہنتی ہو۔ ہڈی اور چقماق کے اوزار اپنے ساتھ رکھتی ہو۔ شاید کسی غار کی دیوار پر پینٹنگ بھی بناتی ہو—اپنے وجود کی نشانیاں اپنی کہانی انے والی دنیا کے لیے چھوڑتی ہوئی۔

اس کا چہرہ صرف تاریخ کے ایک دورکی بحالی نہیں ہے بلکہ یہ ہمارے ماضی کی سمت کھلتی ایک کھڑکی ہے۔ اس کھڑکی سے نظر اتا منظر ہمیں یاد دلاتا ہے کہ انسانی تاریخ صرف بے جان عمارتوں اور اشیاء کی ہی نہیں، یہ ہم اپ جیسے زندہ لوگوں کی کہانی بھی ہے—جو ہنستے، مسکراتے، خواب دیکھتے، اور مشکل ترین حالات میں بھی زندہ رہتے تھے۔

اگر وہ آج کسی بھیڑ میں آپ کے سامنے اچانک سے آ جائے تو کیا آپ اسے پہچان پائیں گے؟ شاید نہیں۔ یہ کہانی ہمیں یاد دلاتی ہے کہ تاریخ مادی باقیات کا مجموعہ نہیں، بلکہ انسانوں کے وجود ان کے دیکھے گئے خوابوں کا ثبوت بھی ہے۔