ابنِ سینا یونیورسٹی، میرپور خاص: ایک روشن مثال

شارق علی
ویلیوورسٹی

چند روز پہلے مجھے میرپور خاص میں واقع ابنِ سینا یونیورسٹی دیکھنے کا موقع ملا۔ اس دعوت کا اہتمام میرے دیرینہ دوست اور کلاس فیلو، پروفیسر سید رضی محمد نے کیا تھا، جو اس ادارے کے چانسلر ہیں۔ ان کی محبت بھری میزبانی اور پرجوش ٹیم کا بھرپور استقبال میرے لیے ایک خوشگوار اور یادگار تجربہ تھا۔

مجھے بتایا گیا کہ ابنِ سینا یونیورسٹی میرپور خاص ڈویژن کی پہلی چارٹرڈ یونیورسٹی ہے، جس نے تقریباً 25 لاکھ آبادی والے اس خطے میں اعلیٰ تعلیم کی محرومی کو حقیقی معنوں میں ختم کیا ہے۔ 1999 میں جب یہ ادارہ اپنی ابتدائی شکل میں قائم ہوا تو پورے ڈویژن میں ایک بھی اعلیٰ ڈگری یافتہ اسکالر موجود نہ تھا۔ آج انہی کوششوں کی بدولت خطے میں 248 سے زائد اسکالرز تیار ہو چکے ہیں، اور ساتھ ہی 2000 سے زیادہ میڈیکل گریجویٹس ملک کے ہر ضلع اور دنیا کے ہر آباد براعظم میں خدمات انجام دے رہے ہیں۔ یہ بلا شبہ ایک غیر معمولی تعلیمی اور سماجی تبدیلی ہے۔

اس تعلیمی سفر میں کئی ادارے شریک ہیں، جن میں محمد میڈیکل کالج (MMC)، محمد ڈینٹل کالج، محمد انسٹیٹیوٹ آف فزیوتھیراپی اینڈ ری ہیبلیٹیشن سائنسز، محمد انسٹیٹیوٹ آف سائنس اینڈ ٹیکنالوجی، اور محمد انسٹیٹیوٹ آف پیرامیڈکس ٹریننگ شامل ہیں۔

اس وقت 500 طلبہ ایم بی بی ایس، 150 بی ڈی ایس، 200 ڈاکٹر آف فزیوتھیراپی، 75 نرسنگ اور 216 پیرامیڈکس میں تعلیم حاصل کر رہے ہیں۔

میرے لیے سب سے متاثر کن پہلو یہ تھا کہ محمد میڈیکل کالج کے سو سے زائد سینئر اساتذہ وہ نوجوان ہیں جنہیں اسی ادارے نے تیار کیا یا پوسٹ گریجویشن کے لیے اسپانسر کیا۔ یہ انسانی سرمائے میں طویل مدتی سرمایہ کاری کی ایک شاندار مثال ہے۔

پروفیسر سید رضی محمد اور ان کی ٹیم کی یہ جدوجہد نہ صرف میرپور خاص بلکہ پورے پاکستان کے لیے ایک رول ماڈل کی حیثیت رکھتی ہے۔ ان کی کوششوں نے ثابت کیا ہے کہ اخلاص، وژن اور مسلسل محنت ایک پورے علاقے کا مستقبل بدل سکتی ہے۔۔